செய்திகள்

டெல்லி: வருகிற மார்ச் 31ம்தேதி, வங்கிகள் செயல்படுமா? செயல்படாதா? என்ற பெருத்த குழப்பம் ஏற்பட்டுள்ளது.

இந்த குழப்பத்தை ரிசர்வ் வங்கி ஏற்கனவே தெளிவுபடுத்திய நிலையில், வங்கி அதிகாரிகளும் இதுகுறித்து விளக்கம் தந்துள்ளனர்.

வருடா வருடம் ஏப்ரல் 1-ம் தேதி முதல் மார்ச் 31-ம் தேதி வரை வங்கிகளுக்கு பொருளாதார ஆண்டாக கணக்கிடப்படுகிறது… அதன்படி, முதல் நாள் மற்றும் கடைசி நாளில் வங்கிகள் அனைத்துமே கட்டாயம் இயங்கும்.

கடைசி நாள்: வரும் மார்ச் 31-ம் தேதி, இந்த வருடத்தின் கடைசி நாளாகும்… ஆனால், அன்றைய தினம் ஞாயிற்றுக்கிழமையாக வருகிறது.. எனவே, வங்கிகள் அன்றைய தினம் செயல்படுவதற்கான வாய்ப்பில்லை என்று தகவல்கள் வெளியாகியிருந்தன.

ஆனால், 2 நாட்களுக்கு முன்பு, அரசின் செயல்பாடுகளுக்காகவும், பல்வேறு நிர்வாக காரணங்களுக்காகவும் மார்ச் 31-ம் தேதி அதாவது ஞாயிற்றுக்கிழமை வங்கிகள் வழக்கம்போல் செயல்படும் என்று ரிசர்வ் வங்கி அதிரடியாக அறிவித்திருந்தன.

ரசீதுகள்: அனைத்து வங்கிகளுக்கும் இது தொடர்பான கடிதமும் அனுப்பப்பட்டிருந்தது.. அதில், “2023 நிதியாண்டில் ரசீதுகள் மற்றும் கொடுப்பனவுகள் தொடர்பான அனைத்து அரசாங்க பரிவர்த்தனைகளுக்கும் கணக்கு காட்டுவதற்காக, மார்ச் 31, 2024 (ஞாயிற்றுக்கிழமை) அன்று பரிவர்த்தனைகளுக்கு அரசாங்க ரசீதுகள் மற்றும் கொடுப்பனவுகளைக் கையாளும் வங்கிகளின் அனைத்து கிளைகளையும் திறக்க வேண்டும்.

இந்த விதிவிலக்கான நாளில் வங்கிச் சேவைகள் கிடைப்பதை விளம்பரப்படுத்த அறிவுறுத்தப்பட்டுள்ளது. நடப்பு நிதியாண்டின் கடைசி நாளான 2023-24 அன்று வருவதால் இந்த முடிவு எடுக்கப்பட்டுள்ளது” என்று தெரிவிக்கப்பட்டிருந்தது

வதந்திகள்: இந்நிலையில், ஞாயிறு விடுமுறை என்று வாட்ஸ்அப்பில் தொடர்ந்து பரவிவரும் வதந்திகளுக்கு மறுப்பு தெரிவித்து, வங்கி அதிகாரிகள் தற்போது விளக்கம் தந்துள்ளனர்..

அதிகாரிகள் சொல்லும்போது, “வங்கிகளுக்கு ஞாயிற்றுக்கிழமை வழக்கமான விடுமுறை நாளாகும். இந்நிலையில், இந்த நிதியாண்டு வரும் 31-ம் தேதியுடன் நிறைவடைகிறது. அதனால், அரசு கணக்குகளில் பணம் எடுத்தல், பணம் செலுத்துதல் உள்ளிட்ட பரிவர்த்தனைகளை மேற்கொள்வதற்கு வசதியாகவும், வருமானவரி உள்ளிட்ட வரிகளை செலுத்துவதற்கு வசதியாகவும் அரசு கணக்குகள் வைத்துள்ள வங்கிக் கிளைகள் மட்டும் வரும் 31-ம் தேதியன்று செயல்படுமாறு ரிசர்வ் வங்கி அறிவுறுத்தி உள்ளது.

பரிவர்த்தனைகள்: மற்ற கிளைகள் அன்றைய தினம் செயல்படாது. மேலும், அன்றைய தினம் பொதுமக்களின் வழக்கமான வங்கிப் பரிவர்த்தனைகளும் நடைபெறாது. இது தொடர்பாக, சமூகவலை தளங்களில் பரவி வரும் தகவல் தவறானது” என்று மீண்டும் அதிகாரிகள் கூறியிருக்கிறார்கள்.

இந்த திடீர் குழப்பத்துக்கு காரணம், இந்த மார்ச் மாதத்தில் மட்டுமே மொத்தம் 18 நாட்கள் வங்கிகள் விடுமுறையாகும்.. இதுகுறித்து ஏற்கனவே ரிசர்வ் வங்கி, மாதாந்திர லிஸ்ட் வெளியிட்டிருந்தது. எனவேதான், ஞாயிற்றுக்கிழமை விடுமுறை இருக்கலாம் என்ற தகவல் பரவியது.,. தற்போது, இந்த அறிக்கை வெளியிட்டு, இந்த குழப்பத்தை ரிசர்வ் வங்கியும், வங்கி அதிகாரிகளும் மீண்டும் தெளிவுபடுத்தியிருக்கிறார்கள்.

ஊட்டி : 100 சதவீதம் வாக்களிப்பதன் அவசியம் குறித்து கையெழுத்து இயக்கத்தை கலெக்டர் துவக்கி வைத்தார். பாராளுமன்ற தேர்தலில் 100 சதவீதம் வாக்களிப்பது குறித்து விழிப்புணர்வு ஏற்படுத்தும் வகையில் நீலகிரி மாவட்டத்தில் பல்வேறு நிகழ்ச்சிகளை மாவட்ட நிர்வாகம் நடத்தி வருகிறது.

மாவட்டத்தின் முக்கிய இடங்கள் மற்றும் சுற்றுலா தலங்களில் போட்ேடா ஸ்பாட்டுகள் அமைத்து விழிப்புணர்வு ஏற்படுத்தி வருகிறது. மேலும், மனித சங்கிலி நிகழ்ச்சி நடத்தப்பட்டது. இதில், மகளிர் சுய உதவி குழுக்களை சேர்ந்த பெண்கள், சமூக நலத்துறை பணியாளர்கள் மற்றும் குழந்தைகள் வளர்ச்சித் திட்ட பணியாளர்கள் கலந்துக் கொண்டு பொதுமக்களுக்கு விழிப்புணர்வு ஏற்படுத்தினர்.

இந்நிலையில், நேற்று ஊட்டி மத்திய பேருந்து நிலையத்தில், தேர்தல் பருவம்-தேசத்தின் பெருமிதம் என்ற மைய கருத்தின் படி, 100 சதவீதம் வாக்களிப்பதன் அவசியம் குறித்து, வாக்காளர்களிடையே விழிப்புணர்வு ஏற்படுத்தும் வகையில் கையெழுத்து இயக்கத்தினை மாவட்ட தேர்தல் நடத்தும் அலுவலர் மற்றும் மாவட்ட கலெக்டர் அருணா துவக்கி வைத்தார். தொடர்ந்து அவர் பேசியதாவது:

இந்திய தேர்தல் ஆணையத்தால் பாராளுமன்ற பொதுத்தேர்தல் 2024 வாக்குப்பதிவு 19ம் தேதி நடைபெறவுள்ளதாக தெரிவிக்கப்பட்டுள்ளது. இதனை தொடர்ந்து, நீலகிரி மாவட்டத்தில் மாவட்ட நிர்வாகத்தின் சார்பில் வாக்காளர்களிடையே நடைபெறவுள்ள பாராளுமன்ற பொதுத்தேர்தலில் 100 சதவீதம் வாக்குப்பதிவினை உறுதி செய்யும் வகையில் பல்வேறு விழிப்புணர்வு நிகழ்ச்சிகள் தொடர்ந்து நடத்தப்பட்டு வருகிறது. அந்த வகையில், ஊட்டி மத்திய பேருந்து நிலையத்தில் 100 சதவீதம் வாக்களிப்பதன் அவசியம் குறித்து, வாக்காளர்களிடையே விழிப்புணர்வு ஏற்படுத்தும் வகையில் கையெழுத்து இயக்கம் நடத்தப்பட்டது.

இவ்வாறு அவர் பேசினார்.முன்னதாக, ஊட்டி மத்திய பேருந்து நிலையத்தில் என் வாக்கு – என் உரிமை என்ற தலைப்பில் அமைக்கப்பட்டுள்ள செல்பி ஸ்பாட்டில் நின்று வாக்காளர்களிடையே விழிப்புணர்வு ஏற்படுத்தும் வகையில் கலெக்டர் புகைப்படம் எடுத்துக் கொண்டார். இந்நிகழ்வில், கூடுதல் ஆட்சியர் (வளர்ச்சி) கௌசிக், உதவி தேர்தல் நடத்தும் அலுவலர் மற்றும் வருவாய் கோட்டாட்சியர் மகராஜ், தேர்தல் விழிப்புணர்வு பொறுப்பு அலுவலர் மற்றும் ஆவின் பொதுமேலாளர் ஜெயராமன், மகளிர் திட்ட இயக்குநர் காசிநாதன், மாவட்ட சமூக நல அலுவலர் பிரவீணா தேவி, மாவட்ட குழந்தைகள் பாதுகாப்பு அலுவலர் (பொ) ஷோபனா, உதவி திட்ட அலுவலர் ஜெயராணி, ஊட்டி தாசில்தார் சரவணகுமார் உட்பட பலர் கலந்து கொண்டனர்.

ரஷ்யா: ரஷ்ய தலைநகர் மாஸ்கோவில் நடத்தப்பட்ட தீவிரவாத தாக்குதலுக்கு காங்கிரஸ் தலைவர் மல்லிகார்ஜுன கார்கே கண்டனம் தெரிவித்துள்ளார்.

ரஷ்யாவில் அண்மையில் நடைபெற்ற அதிபர் தேர்தலில் விளாடிமிர் புதின் வெற்றி பெற்றார். 200 ஆண்டுகளுக்குப் பின்னர் மீண்டும் தொடர்ச்சியாக 3வது முறையாக அதிபராகி சாதனையை முறியடித்திருந்தார். இந்நிலையில் நேற்றைய தினம் மாஸ்கோவின் மேற்குப் பகுதியில் உள்ள க்ரோகஸ் நகரின் மையத்தில் உள்ள 6200 பேர் அமரக்கூடிய பிரம்மாண்ட இசையரங்கில் இந்தத் தாக்குதல் நடைபெற்றது. சம்பவத்தின் போது அங்கு ரஷ்ய பேண்ட் இசைக் குழுவான ‘பிக்னிக்’ குழுவின் இசை நிகழ்ச்சி நடந்து கொண்டிருந்தது. அப்போது திடீரென துப்பாக்கிக் குண்டுகள் பாய பலர் சரிந்து விழுந்தனர்.

துப்பாக்கிச் சூடு நடத்தியது மட்டுமல்லாது அரங்குக்கு பயங்கரவாதிகள் தீவைத்தும் சென்றனர். உடனடியாக தகவலறிந்த காவல், தீயணைப்பு, பாதுகாப்புப் படையினர் சம்பவ இடத்துக்கு விரைந்தனர். இந்த சம்பவத்தில் இதுவரை 60 பேர் பலியாகியுள்ளனர். 100க்கும் மேற்பட்டோர் படுகாயமடைந்துள்ளனர். இத்தகைய கொடூர தாக்குதலுக்கு காங்கிரஸ் தலைவர் மல்லிகார்ஜுன கார்கே கடும் கண்டனம் தெரிவித்துள்ளார். இது தொடர்பாக அவர் கூறுகையில், மாஸ்கோவில் அப்பாவி மக்கள் மீது நடத்திய கொடூர தாக்குலை இந்திய தேசிய காங்கிரஸ் வன்மையாக கண்டிக்கிறது. இந்த துயரமான நேரத்தில் பாதிக்கப்பட்டவர்களுக்கும், ரஷ்ய கூட்டமைப்புக்கும் காங்கிரஸ் தோளோடு தோளாக துணை நிற்கும். தீவிரவாதம் மனித குலத்திற்கும், அமைதிக்கும் மிகப்பெரிய அச்சுறுத்தலாக உள்ளது. ரஷ்ய தலைநகர் மாஸ்கோவில் நடைபெற்ற இசை நிகழ்ச்சியில் மர்மநபர்கள் நடத்திய துப்பாக்கிச்சூட்டில் 60 பேர் உயிரிழந்தனர்.

வாக்கு சேகரிக்கும்போது முதல்வருடன் Selfie.. உற்சாகமடைந்த தஞ்சை மக்கள்..! #MKStalin #DMK #cmSelfi #NewsTamil24x7 pic.twitter.com/ENKU4g0J3p

— News Tamil 24×7 | நியூஸ் தமிழ் 24×7 (@NewsTamilTV24x7) March 23, 2024

தேதி : 22.03.24
நாள் : வெள்ளி.

அரவக்குறிச்சியில் மஹான் காயலா பாவா தர்ஹா வளாகத்தில் ரமலான் சிறப்பு இப்தார் நோன்பு திறப்பு விழாவில் அரவக்குறிச்சி சட்டமன்ற உறுப்பினர் மொஞ்சனூர் PR இளங்கோ, தமிழ்நாடு காங்கிரஸ் கமிட்டி வழக்கறிஞர் பிரிவு மாநிலச் செயலாளர் வழக்கறிஞர் திரு.க.முகமதுஅலி, தமிழ்நாடு காங்கிரஸ் கமிட்டி, தொழில்நுட்பம் மற்றும் சமூக ஊடகத்துறை மாவட்டத் தலைவர் திரு.க.பாலமுருகன், அரவக்குறிச்சி கிழக்கு ஒன்றிய தி.மு.கழக செயலாளர் திரு.N.மணிகண்டன், அரவக்குறிச்சி பேரூர் தி.மு.கழக செயலாளர் திரு.B.S.மணி, தி.மு.கழக நிர்வாகிகள் மற்றும் ஜமாத்தார்கள் கலந்து கொண்டு விழாவை சிறப்பித்தனர்.

உலக தண்ணீர் தினத்தை முன்னிட்டு மதுரை வைகை ஆற்றை சுத்தப்படுத்திய சமூக ஆர்வலர்கள், மாணவ‌, மாணவியர்

மார்ச் 22 உலக தண்ணீர் தினத்தை முன்னிட்டு வைகை நதி மக்கள் இயக்கம் சார்பில் மதுரை வைகை ஆற்றின் மைய மண்டபத்தில் வைத்து தண்ணீர் தினம் கொண்டாடப்பட்டது.

இந்த நிலையில் வைகை நதி குறித்து சொற்பொழிவும் மற்றும் வைகை தூய்மை படுத்தும் பணி நடைப்பெற்றது. 500க்கும் மேற்பட்ட மாணவ மாணவிகள் மற்றும் சமூக ஆர்வலர்கள் கலந்து கொண்டு வைகை ஆற்றில் கிடந்த பிளாஸ்டிக் கழிவுகள், குப்பைகளை அகற்றினர்‌. அதோடு
உலக தண்ணீர் தினத்தில் வைகை நதியை மாசு படுத்த மாட்டோம். மாசு படுத்த அனுமதிக்க மாட்டோம் என்று உறுதிமொழி எடுத்து கொண்டனர்.

இந்த நிகழ்வில் வைகை நதி மக்கள் இயக்கம் தலைவர் ராஜன், மதுரை ஜல்லிக்கட்டு ரோட்டரி சங்க செயலாளர் கதிரவன் தமிழ்நாடு அறிவியல் இயக்கம் தலைவர் பேராசிரியர் எம் ,ராஜேஷ், மதுரை அட்சய பாத்திரம் டிரஸ்ட் நிறுவனர் நெல்லை பாலு உள்ளிட்டோர் கலந்து கொண்டனர்.

அண்ணா திராவிட மக்கள் முன்னேற்றக் கழக துணைப் பொதுச்செயலாளரும், தென்மண்டல பொறுப்பாளருமான தலைமை கழக தேர்தல் பிரிவு செயலாளர் நெல்லை மேட்டுப்பட்டி டாக்டர் முத்துக்குமார் அறிக்கை வெளியிட்டுள்ளார்.

அந்த அறிக்கையில் அவர் கூறியுள்ளதாவது :-

நடைபெற உள்ள நாடாளுமன்ற தேர்தலில் இந்தியா கூட்டணி சார்பாக திமுக தலைமையில் அனைத்து கட்சி சார்பாக போட்டியிடும் வேட்பாளர்கள் மற்றும் தென்காசி(தனி) வேட்பாளர் டாக்டர் ராணி ஸ்ரீகுமார் அமோக வெற்றி பெற அதிமமுக தலைமை கழக நிர்வாகிகள், மாநில,மாவட்ட,நகர ஒன்றிய,பேரூர் கழக கிளை கழக சார்பு அணி நிர்வாகிகள், தொண்டர்கள் அனைவரும் முழு ஒத்துழைப்புக் கொடுத்து நாம் அனைவரும் பாடுபட வேண்டும் என அந்த அறிக்கையில் கூறியுள்ளார்.

புதுடெல்லி: காங்கிரஸ் கட்சிக்கு வந்த ரூ.14.40 லட்சத்திற்கு கணக்கு காட்டததால் ரூ.285 கோடி நிதியை வருமானவரித்துறை முடக்கி உள்ளதாக காங்கிரஸ் தலைவர்கள் கார்கே, சோனியா குற்றம் சாட்டி உள்ளனர்.

2018-2019ம் ஆண்டுக்கான வருமான வரி கணக்கை தாமதமாக தாக்கல் செய்ததாக கூறி காங்கிரஸ் கட்சிக்கு கடந்த பிப்ரவரி மாதம் திடீரென வருமானவரித்துறையினர் நோட்டீஸ் அனுப்பினர். அதில் தகவல் முரண்பாடு இருப்பதாக கூறி வங்கி கணக்குகளை வருமான வரித்துறையினர் கடந்த மாதம் முடக்கினார்கள்.

கட்சியின் 11 கணக்குகளில் 8 கணக்குகள் முடக்கப்பட்டுள்ளது. அதில் ரூ.285 கோடி நிதி உள்ளது. மேலும் 45 நாட்கள் தாமதமாக வருமான வரி தாக்கல் செய்ததற்காக அபராதமும் விதிக்கப்பட்டது. மக்களவை தேர்தல் தேதி அறிவிக்கப்பட்டுள்ள நிலையில், அரசியல் கட்சிகள் அனைத்தும் தீவிரமாக பணிகளை மேற்கொண்டுள்ளது. இந்நிலையில் உள்நோக்கத்துடன் காங்கிரஸ் கட்சியின் வங்கி கணக்குகள் அனைத்தும் முடக்கப்பட்டுள்ளதாக காங்கிரஸ் கட்சி தலைவர்கள் பிரதமர் மீது குற்றம் சாட்டியுள்ளனர்.

டெல்லியில் காங்கிரஸ் தலைவர் மல்லிகார்ஜூன கார்கே, முன்னாள் தலைவர்கள் சோனியாகாந்தி, ராகுல்காந்தி ஆகியோர் நேற்று செய்தியாளர்களை சந்தித்தனர். அப்போது பேசிய கார்கே, ‘மக்களவை தேர்தலில் சமநிலையை உறுதிப்படுத்துவதற்கு காங்கிரஸ் கட்சியின் முடக்கப்பட்ட வங்கி கணக்குகளை செயல்பட அனுமதிக்க வேண்டும். சுதந்திரமான மற்றும் நியாயமான தேர்தல் நடைபெற வேண்டுமானால் முடக்கப்பட்ட காங்கிரஸ் கட்சியின் வங்கி கணக்குகளை அணுகுவதற்கு அனுமதிக்க வேண்டும் என அரசியலமைப்புக்களுக்கு நான் வேண்டுகோள் விடுக்கிறேன் ” என்றார்

இதனை தொடர்ந்து பேசிய கட்சியின் முன்னாள் தலைவர் சோனியாகாந்தி, ”ஜனநாயக கட்டமைப்பை பாதுகாக்க வேண்டிய நிறுவனங்கள் இருக்கின்றன. ஆனால் எதுவும் நடக்கவில்லை. காங்கிரஸ் கட்சியின் வங்கி கணக்கில் இருந்து வலுகட்டாயமாக பணம் எடுக்கப்படுகின்றது. ஒரு பக்கம் தேர்தல் பத்திரங்கள் பாஜவிற்கு மிகப்பெரிய பயனளித்துள்ளது. மறுபுறம் முக்கிய எதிர்கட்சிகளின் நிதி உறுதியாக தாக்குதலுக்கு உட்பட்டுள்ளது. காங்கிரஸ் கட்சியின் வங்கி கணக்குகளை முடக்கியது மக்களவை தேர்தல் நேரத்தில் கட்சியை பலவீனப்படுத்துவதற்கான பிரதமர் மோடியின் திட்டமிட்ட முயற்சியாகும்.

இந்த சவால்களுக்கு மத்தியிலும் எங்கள் பிரசாரத்தின் செயல்திறனை தக்கவைப்பதற்கு எங்களால் முடிந்த அனைத்தையும் செய்து வருகிறோம். இந்த விவகாரம் மிகவும் தீவிரமானது. இது காங்கிரஸ் கட்சியை மட்டுமல்ல இந்தியாவின் ஜனநாயகத்தையும் பாதிக்கும்” என்றார். காங்கிரஸ் கட்சியின் பொருளாளர் அஜய் மக்கென் கூறுகையில், ”எங்களது வங்கி கணக்குகளை முடக்கியதன் மூலமாக கட்சிக்கு பொதுமக்கள் அளித்த நன்கொடைகளை பாஜ கொள்ளையடித்துள்ளது.

வலுகட்டாயமாக வங்கி பணத்தை எடுத்துக்கொண்டுள்ளது. வருமான வரித்துறை மேல்முறையீட்டு தீர்பாயத்திடம் மேல்முறையீடு செய்யப்பட்டது. மார்ச் 8ம் தேதி காங்கிரஸ் மனு தள்ளுபடி செய்யப்பட்டது. இதனால் ரூ.285 கோடி வரவு உள்ள காங்கிரஸ் வங்கி கணக்கை வருமானவரித்துறை முடக்கியது. இதை எதிர்த்து டெல்லி உயர் நீதிமன்றத்தில் விண்ணப்பம் செய்தும் நிவாரணம் கிடைக்கவில்லை.

இந்த நேரத்தில் தேர்தல் தேதி அறிவிக்கப்பட்ட நிலையில் எந்தவித விளம்பரம், தேர்தல் செலவுக்கு பணம் கொடுக்க முடியாமல் காங்கிரஸ் கட்சி திண்டாடியது. 1994-95 காலகட்டத்தில் சீத்தாராம் கேசரி பதவிக்காலத்தில் அதாவது 30 ஆண்டுகளுக்கு முன்பு உள்ள கணக்கிற்கு வருமானவரி தாக்கல் தொடர்பாக கடந்தவாரம் நோட்டீஸ் அனுப்பி உள்ளனர்.

வருமானவரி விதிகளின் படி தாமதாக தாக்கல் செய்தால் அதிகபட்சமாக ரூ.10 ஆயிரம் அபராதம் விதிக்கப்படும். ஆனால் கணக்குகளில் முரண்பாடு பிரச்னைக்கு வெறும் 7 பைசாவுக்கு ரூ.106 தண்டனையாக விதிக்கப்பட்டுள்ளது. அதாவது ரூ.14 லட்சத்து 40 ஆயிரம் கணக்கில் வரவு வராததற்கு ரூ.210 கோடி அபராத தண்டனை விதிக்கப்பட்டுள்ளது. அனைத்து அரசியல் கட்சிகளுக்கும் வருமான வரி கட்டுவதில் இருந்து விலக்கு அளிக்கப்பட்டுள்ளது. ஆனால் காங்கிரசுக்கு மட்டும் ஏன் தண்டனை விதிக்கப்படுகிறது’ என்றார்.

* 2 ரூபாயை கூட எங்களால் செலவழிக்க முடியவில்லை ராகுல்காந்தி வேதனை
காங்கிரஸ் முன்னாள் தலைவர் ராகுல் காந்தி கூறியதாவது: உங்களது வங்கி கணக்கு, ஏடிஎம் அட்டை, மொத்த நிதி அடையாளம் அழிக்கப்பட்டுவிட்டது என்று நினைத்துப்பாருங்கள். அல்லது அழிக்கப்பட்டுவிட்டது என்று நினைத்துப்பாருங்கள். இது ஒரு குடும்பத்திற்கு நிகழ்ந்தால் அவர்கள் பட்டினி கிடப்பார்கள். வியாபாரத்திற்கு நிகழ்ந்தால் அந்த வியாபாரம் முடங்கிப்போகும். இதுதான் ஒரு மாதத்திற்கு முன்பு காங்கிரஸ் கட்சிக்கு நிகழ்த்தப்பட்டது. எங்களின் அனைத்து வங்கி கணக்குகளும் முடக்கப்பட்டன.

பிரசாரம் செய்ய முடியாது. தொண்டர்களுக்கோ அல்லது வேட்பாளர்களுக்கோ உதவ முடியாது. ஒரு இடத்தில் இருந்து மற்றொரு இடத்திற்கு விமானத்தில் செல்ல முடியாது. விமானத்தில் செல்வதை விடுங்கள். ரயிலில் கூட செல்ல முடியாது. தேர்தல் பிரசாரத்திற்கு 2 வாரத்திற்கு முன்பு இது செய்யப்பட்டுள்ளது. ஆச்சர்யமானது என்னவென்றால் இந்த நாட்டில் ஏராளமான அமைப்புகள் உள்ளன. அவை ஜனநாயகத்தை பாதுகாக்க வேண்டும். நீதிமன்றங்கள் உள்ளன. தேர்தல் ஆணையம் உள்ளது. ஆனால் எதுவும் நடக்கவில்லை.

பொறுங்கள், நாட்டின் பெரிய கட்சிகளுள் ஒன்றின் வங்கி கணக்கை முடக்கியிருக்கிறீர்கள் என்று கூட தேர்தல் ஆணையம் சொல்லவில்லை. தேர்தலில் போட்டியிடும் எங்களின் திறன் ஏற்கனவே பாதிக்கப்பட்டுவிட்டது. இந்த போராட்டத்தில் ஏற்கனவே ஒரு மாதம் போய்விட்டது. விளம்பரம் செய்ய முடியவில்லை. செய்தித்தாள்களில்விளம்பரம்கொடுக்கமுடியவில்லை. இது என்ன மாதிரியான ஜனநாயகம்.

காங்கிரஸ் மீது செய்யப்படும் தாக்குதல் இது. இந்த தாக்குதல் பிரதமர் மற்றும் உள்துறை அமைச்சரால் செய்யப்படுகிறது. இந்தியா ஜனநாயக நாடு என்பது பொய். இந்தியாவில் தற்போது ஜனநாயகம் என்பதே இல்லை. உலகின் மிகப்பெரிய ஜனநாயக நாடு இந்தியா என்பது பொய். முற்றிலும் பொய். 20 சதவீத இந்தியா எங்களுக்கு வாக்களித்து இருக்கிறது. ஆனால் 2 ரூபாயை கூட எதற்கும் எங்களால் செலவழிக்கமுடியவில்லை. இவ்வாறு தெரிவித்தார்.

சென்னை: பொன்முடிக்கு மீண்டும் அமைச்சராக பதவிப் பிரமாணம் செய்து வைப்பதில் முடிவு எடுக்க ஆளுநருக்கு 24 மணி நேரம் கெடு விதித்திருந்த நிலையில் இன்று (வெள்ளிக்கிழமை) மாலை 3.30 மணியளவில் ஆளுநர் ஆர்.என்.ரவி பொன்முடிக்கு பதவிப் பிரமாணம் செய்து வைப்பதாக தகவல் வெளியாகியுள்ளது.

சென்னை கிண்டியில் உள்ள ஆளுநர் மாளிகையில் இந்தப் பதவிப் பிரமாண நிகழ்ச்சி நடைபெறும் எனத் தெரிகிறது.

இந்நிலையில் மீண்டும் அவருக்கு அவர் வகித்துவந்த உயர்கல்வித் துறையே ஒதுக்கப்படும் என்றும் தகவல்கள் வெளியாகியுள்ளன. இப்போது அந்தத் துறை ராஜகண்ணப்பன் வசம் கூடுதல் பொறுப்பாக வழங்கப்பட்டுள்ளது என்பது குறிப்பிடத்தக்கது.

வழக்கு, தண்டனை, தடை: தமிழக உயர்கல்வித் துறை அமைச்சராக பதவி வகித்த பொன்முடி, கடந்த 2006-11 காலகட்டத்தில் அமைச்சராக இருந்தபோது வருமானத்துக்கு அதிகமாக சொத்து குவிப்பில் ஈடுபட்டதாக அவர் மீதும், அவரது மனைவி விசாலாட்சி மீதும் கடந்த 2011-ம்ஆண்டு வழக்கு பதிவு செய்யப்பட்டது.

இந்த வழக்கில் இருந்து இருவரையும் விடுதலை செய்து விழுப்புரம் ஊழல் தடுப்பு சிறப்பு நீதிமன்றம் கடந்த 2016-ம் ஆண்டு தீர்ப்பளித்தது. இந்த தீர்ப்பை எதிர்த்து லஞ்ச ஒழிப்பு துறை போலீஸார் உயர் நீதிமன்றத்தில் மேல்முறையீடு செய்தனர். இந்தவழக்கை விசாரித்த உயர் நீதிமன்றம், தமிழக அமைச்சராக பதவி வகித்த பொன்முடி மற்றும் அவரது மனைவிக்கு 3 ஆண்டு சிறை தண்டனை மற்றும் தலா ரூ.50 லட்சம் அபராதம் விதித்து கடந்த டிச.19-ம் தேதி தீர்ப்பளித்தது. இதனால் பொன்முடியின் அமைச்சர் பதவி பறிபோனது.

இந்நிலையில், உயர் நீதிமன்றத்தின் தீர்ப்பை எதிர்த்து பொன்முடி தரப்பில் உச்ச நீதிமன்றத்தில் மேல்முறையீடு செய்யப்பட்டது. அந்தவழக்கை விசாரித்த உச்ச நீதிமன்றம், பொன்முடி மற்றும் அவரது மனைவிக்கு விதிக்கப்பட்ட 3 ஆண்டு சிறை தண்டனையை நிறுத்தி வைத்தும், பொன்முடியை குற்றவாளி என அறிவித்த தீர்ப்புக்கு தடை விதித்தும் உத்தரவிட்டது.

முதல்வரின் பரிந்துரையும், ஆளுநரின் நிராகரிப்பும்: இதனையடுத்து எம்எல்ஏவாக பொன்முடி தொடர்ந்து நீடிப்பதாக அறிவிக்கப்பட்டது. அவருக்கு மீண்டும் அமைச்சராக பதவிப் பிரமாணம் செய்து வைக்க கோரி,அதற்கான பரிந்துரையை ஆளுநர் ஆர்.என்.ரவிக்கு முதல்வர் ஸ்டாலின் அனுப்பி வைத்தார். ஆனால், ஆளுநர் அந்த பரிந்துரையை நிராகரித்தார்.

இதைத் தொடர்ந்து, தமிழக அரசு சார்பில் உச்ச நீதிமன்றத்தில் ஆளுநருக்கு எதிராக வழக்கு தொடரப்பட்டது. இந்த வழக்கை விசாரித்த உச்ச நீதிமன்றம், ‘ஆளுநரின் செயல் அரசியலமைப்பு சட்டத்துக்கு எதிரானது. ஜனநாயக முறைப்படி மனுதாரருக்கு பதவிப் பிரமாணம் செய்து வைக்குமாறு முதல்வர் பரிந்துரை செய்துள்ளார். அதை ஆளுநர் எப்படி நிராகரிக்க முடியும். முதல்வரின் தனிப்பட்ட அதிகாரத்தில் ஆளுநர் எப்படி தலையிட முடியும். இந்த விவகாரத்தில் ஆளுநர் தனது முடிவை 24 மணி நேரத்துக்குள் எடுக்க வேண்டும். இல்லாவிட்டால், எங்களது நடவடிக்கை என்ன என்பதை இப்போது நாங்கள் கூறப்போவது இல்லை’ என்று கெடு விதித்தது. இந்நிலையில் இன்று மாலை பொன்முடிக்கு ஆளுநர் ரவி பதவிப் பிரமாணம் செய்துவைக்கிறார் என்று தகவல் வெளியாகியுள்ளது.

டெல்லி முதலமைச்சரும், இந்தியா கூட்டணியின் தலைவர்களில் ஒருவருமான அரவிந்த் கெஜ்ரிவால் அமலாக்கத்துறையால் நேற்றிரவு அதிரடியாக கைது செய்யப்பட்டார்.

இந்நிலையில், கைது நடவடிக்கையை எதிர்த்து அவர் தரப்பில் உச்சநீதிமன்றத்தில் தாக்கல் செய்யப்பட்ட மனு இன்னும் சற்று நேரத்தில் விசாரணைக்கு வருகிறது.

கடந்த 2021-22ம் ஆண்டு டெல்லி யூனியன் பிரதேசத்தில் புதிய மதுபான கொள்கை அறிவிக்கப்பட்டது. அதாவது டெல்லியில் மதுபான விற்பனை அரசிடம் இருந்து 4 கார்ப்பரேசன்கள் கைகளுக்கு மாறின. மொத்த மது விற்பனையில் 50% இந்த 4 கார்ப்பரேசன்கள் பகுதிகளில் நடைபெறுகிறது. டெல்லி 32 மண்டலங்களாகப் பிரிக்கப்பட்டு 849 சில்லறை விற்பனை நிலையங்களுக்கு லைசன்ஸ் தரப்பட்டது. இதில் ஏராளமான முறைகேடுகள் நடந்துள்ளன என்பதுதான் புகார்.

இந்த குற்றச்சாட்டில், மது விற்பனை செய்ய லைசன்ஸ் பெற்றவர்களுக்கு ரூ.144.36 கோடிக்கு மேல் தள்ளுபடி செய்யப்பட்டதாகவும், விதிகள், செயல்முறைகளைப் பின்பற்றாமல் ஒரு நிறுவனத்தின் ரூ.30 கோடி மதிப்பிலான டெபாசிட் பணம் திருப்பி அளிக்கப்பட்டதாகவும் குறிப்பிடப்பட்டுள்ளது. இதனையடுத்து இந்த முறைகேடுகள் குறித்து அரசின் தலைமை செயலாளர் அறிக்கை தாக்கல் செய்ய வேண்டும் என ஆளுநர் சக்சேனா கடந்த ஆண்டு ஏப்ரல் மாதம் கேட்டு கொண்டார். அறிக்கையும் தாக்கல் செய்யப்பட்டது.

இந்த அறிக்கையின் அடிப்படையில் சிபிஐ விசாரணைக்கு துணை நிலை ஆளுநர் சக்சேனா பரிந்துரை செய்திருந்தார். மறுபுறம் அமலாக்கத்துறையும் சட்டவிரோத பண பரிமாற்றம் என வழக்குப்பதிவு செய்து விசாரணையை தொடங்கியது. விசாரணைக்காக கெஜ்ரிவாலுக்கு பலமுறை சம்மன் அனுப்பியது. ஆனால் அவர் ஒரே ஒரு சம்மனுக்கு கூட பதிலளிக்கவில்லை. நேரில் ஆஜரானால் கைது உறுதி என்பது தெரிந்த விஷயம்தான். எனவே, ஆஜராவதை தவிர்த்து வந்தார்.

அதே நேரம், அமலாக்கத்துறையின் கைது நடவடிக்கையை எதிர்த்து டெல்லி உயர் நீதிமன்றத்தையும் நாடியிருந்தார். அமலாக்கத்துறையினர் சம்மன் அனுப்ப தடை விதிக்க வேண்டும் என்று கூறியிருந்தார். ஆனால், நீதிமன்றம் மறுத்துவிட்டது. இதனையடுத்து இன்று புதிய மனுவை தாக்கல் செய்திருந்தார். அதில், “விளைவு ஏற்படுத்தக்கூடிய வகையிலான கட்டாய நடவடிக்கை ஏதும் தனக்கு எதிராக அமலாக்கத்துறை அதிகாரிகள் எடுக்கக் கூடாது என நீதிமன்றம் உத்தரவிட வேண்டும். நான் அமலாக்கத்துறை விசாரணைக்கு ஆஜராகினால், தன்னை கைது செய்யமாட்டோம் என நீதிமன்றத்தில் அமலாக்கத்துறை உறுதி அளிக்க வேண்டும்” என்று கோரிக்கை வைத்திருந்தார்.

ஆனால் கெஜ்ரிவாலின் இந்த மனுவை நீதிமன்றம் தள்ளுபடி செய்துவிட்டது. இதனையடுத்து நேற்றிரவு கையில் கைது வாரண்ட்டுடன் கெஜ்ரிவால் வீட்டை முற்றுகையிட்டு அமலாக்கத்துறையினர் ரெய்டு நடத்தினர். இறுதியாக ஜார்க்கண்ட் முதல்வர் ஹேமந்த் சோரன் கைது செய்யப்பட்டதை போன்று கெஜ்ரிவாலும் கைது செய்யப்பட்டுள்ளார்.

முன்னதாக அமலாக்கத்துறையினர் நடவடிக்கைக்கு எதிராக அவர் உச்சநீதிமன்றத்தில் முறையிட்டிருந்தார். இந்த வழக்கு நேற்று இரவு விசாரிக்கப்படும் என்று எதிர்பார்க்கப்பட்டது. ஆனால், சிறப்பு விசாரணை குழு எதையும் உச்சநீதிமன்றம் அமைக்கவில்லை. இந்நிலையில் இன்று இந்த மனு இன்னும் சற்று நேரத்தில் விசாரணைக்கு வருகிறது.

உச்சநீதிமன்றம் ஜனநாயகத்தை பாதுகாக்கும் என்று கூறியுள்ள அவர், கடந்த இரண்டு ஆண்டுகளாக விசாரணை நடத்தி வந்த சிபிஐ மற்றும் அமலாக்கத்துறையினரால், கெஜ்ரிவாலுக்கு எதிராக ஒரு ரூபாயை கூட கைப்பற்ற முடியவில்லை என்று விமர்சித்துள்ளார். கடந்த 2 மாதங்களில் 2வது முதலமைச்சரை அமலாக்கத்துறை கைது செய்துள்ளது என்பது குறிப்பிடத்தக்கது.